As VGMA Unsung Category winner Kula perform as opening act for the 20th Vodafone Ghana Music Awards night for the Accra International Conference Center, you see ein back up vocalist, yes a dey mean the guy e do the small dreads plus ein shades nu, yes that guy Ndee, e be ein a dey come talk about.
Ein government name be Sosu Komi Andy wey ein stage name be Ndee. He be Ghanaian rapper, singer, songwriter then producer. He san be fashion designer (He dey sow shada ruff). Ein parents be Vida Ayorkor Annang then Kofi Sosu-Adatsi. He get five siblings.
Ndee grow up for Nungua and later them move to Tema when ein old man die for 2010 inside. He start ein primary school for Sap’s School, go junior high for Mater Ecclesiae Preparatory for Sokode. Mawuli School be where he go get ein WASSCE certificate wey he proceed go Koforidua Polytechnic. He dey go higher learning for GIMPA, but he chock it small for the time being.
Ndee get affection give music start when ein uncle introduce am to some Ghanaian musicians for that time; Buk Bak, Okomfour Kwadee, Reggie Rockstone plus Obrafour. At that time he feel say he to fit do what dem dey do. This be class 6 matters ooo.
After he make am go junior high, ein old girl buy am Walkman as a reward, wey ein old boy buy am fresh piano. That time too wey he discover Fresh Prince (Not 4X4 Fresh Prince). He start dey rep ein own lyrics as he enter Mawuli School after he join the rap group called UGL.
He get one mixtape album; The Refix. Aside say he then Kula perform that big night, he perform for “Hip-Hop Meets Spoken Word” for Kona Cafe.
He currently dey promote ein new single “Nkadin3l3”. E be Ewe phrase wey dey mean “Wey Tin You Dey Want”.
If he no dey do music agh, he be Purchasing & Supply Manager. He be staunch Manchester United fan.